Davao City – Nagtoo si Association of Barangay Captains (ABC) Davao Chapter President Edgar Ibuyan, Sr. nga wala tuyoa sa mga organizers ang nasinati nga palpak sa 30th SEA Games nga gikatakda November 30-December 11, 2019.
Sumala ni former City Councilor ug karon Bankerohan Barangay Captain Edgar Ibuyan, Sr., naningkamot ang kagamhanan nga mapanindot sa Pilipinas ang sporting events hosting ug normal lamang kining mga isyu sama sa sipyat sa mga organizers.
Segun ni Ibuyan, ang mga reklamo sa pipila ka langyaw’ng atleta nga sila wala matagbaw sa serbisyo lagmit maka-apekto sa imahe sa nasud apan mawala ra kana pag-abot sa panahon.
Matud ni Ibuyan, diha sa bisan unsang mga kalihukan, ang mga kritiko nagapangita gayod og isyu aron aduna sila’y ikabato ngadto sa gobyerno luyo sa mga paningkamot ni Pres. Rodrigo Duterte nga mohumot ang Pilipinas sa tibuok kalibutan.
Kahinumdoman nga gibasol ni Rep. Michael Romero si Sen. Franklin Drilon tungod sa unom ka bulan nga pagka-delatar sa pagpasar sa 2019 National Budget maong nalangay usab ang konstruksyon sa mga gambalay sarang magamit alang sa 30th SEA Games.
Apan gilimod ni Drilon ang pasangil ni Romero sanglit unang nalangan ang Senado sa pagpasar sa national budget karong tuiga tungod ra pod sa binilyon ka pesos nga gipakapin sa House of Representatives diha sa pondong gigahin sa matag distrito.
Gani, lain pang rekomendasyon sa pipila ka sakop sa gabinete ngadto kang Duterte nga i-veto ang nasudnong pundo hinungdan nga duna pa’y mga pasilidad sa sports event wala pa hingpit mahuman.
Suportado usab ni Ibuyan ang palig-alayon kang Sen Bong Go sa ilusad nga imbestigahan kalabot sa kontrobersiyang naani sa biennial sporting spectacle.
Mga tigpaniid nagkanayon nga ang leksyong makuha gikan sa mga palpak karon mao nga dili na kita angay pang mudawat og dagku nga kalihukan ilabi na kung ang gobyerno dili pa andam mugunit og sensitibong aktibidad sama niining 30th SEA Games.
RadyoMan Joel Viray
