Davao City – Gumikan sa Republic Act 8479 kun Downstream Oil Industry Deregulation Law of 1998, ang nasudnong gobyerno pinaagi sa Department of Energy nahimong inutil kay wala gayod sila’y tingog sa pagsita sa mga oil companies nga nagpasulabi sa pag-usbaw sa presyo sa produktong petrolyo.
Sa unang adlaw pa lang sa pagtungtong sa bulan sa Enero nagbitay dayon ang usbaw sa presyo sa gasolina diin ang Liquified Petroleum Gas misunod sab sa pagsaka sa presyo matag kilo sa tangke.
Usa si Davao City Association of the Barangay Captain President ug Councilor Edgar Ibuyan, Sr. ang mitiyabaw sa walay hunong nga pagsaka sa presyo sa gasoline ug LPG.
Matud ni Ibuyan, iya na gayod gibati ang kalisud sa kinabuhi tungod sa pagmahal sa mga palaliton karon hatud sa epekto sa walay kahumanan nga pag-usbaw sa presyo sa petrolyo.
Segun ni Ibuyan nga kung siya mismo nakabati og kalisod unsa na lang kaha ang mga kabus nga walay ikasarang sa pagsustinar sa mga panginahanglanon sama sa LPG aron makaluto og pagkaon.
Sa panahon karon nga nag-ilaid sa tumong kalisod ang kadaghang sa mga Pilipino tambag ni Councilor Ibuyan ngadto sa katawhan nga magdaginot og gamit sa LPG aron maglungtad og pila ka bulan ang pag-gamit niini.
Aminado ang opisyal nga masulbad ra ang pagmahal sa LPG kung ma-repeal ang Oil Deregulation Law kay hangtud naa kini, walay mahimo ang gobyerno diha sa pagpugong sa mga oil companies nga dili magpasaka sa presyo sa petrolyo ug sa LPG.
RadyoMaN Joel Viray
