Ginarespeto ni Iloilo City Police Office Director PSSupt. Martin Defensor Jr. ang kinamatarong ni Councilor Plaridel Nava nga mag-file sang kaso administratibo batok sa iya kag sa 16 ka iban pa nga pulis sa ICPO.
Apang ginpanindugan ni Defensor nga nasunod ang husto nga proseso sa pagdakop sa duha ka bodyguard ni Nava kon sa diin ginbasahan ang mga ini sang Miranda doctrine baliskad sa alegasyon sang konsehal.
Suno kay Defensor nga may nagbasa sang Miranda Doctrine sang ginpatigayon ang pag-arestar sa mag-utod nga Roy kag Julius De los Reyes apang sang nagkinagamo na sa opisina, nag untat ang pagbasa kag ginpadayon sang nagtawhay na ang sitwasyon.
Posible suno kay Defensor nga tungod sa magamo nga sitwasyon , wala na nabatian sang kampo sang konsehal ang pagbasa sang Miranda Doctrine.
Samtang ginpanginwala ni Defensor nga ginasakit ang mag-utod nga De los Reyes agud mapilitan ang mga ini nga itudlo si Councilor Plaridel Nava nga amo ang mastermind sa pagpapatay sa iya pakaisa nga si Mercedes “Ging-ging” Nava.
