Davao City – Puno na ang tanang ICU beds sa Southern Philippine Medical Center kun SPMC nga gitagana alang sa mga COVID-19 patients.
Sa gipagulang COVID-19 bed tracker occupancy sa SPMC sa Disyembre 8, 2020, occupied na ang tanang 30 o 100% na ang occupancy rate sa mga ICU beds.
Samtang, 85.96% o 294 sa 342 ward beds ang occupied na.
Sa eksklusibong interbyu sa RMN Davao kang Dr. Marie Yvette Barez, Infection Control and Prevention Unit chair sa Southern Philippine Medical Center (SPMC), nga daghang mga COVID-19 patients ang nagpaabot nga mabutang sa mga wards ug ICU.
“Naay tulo ( ka mga pasyente) nga gahulat aron masulod sa ICU, sa COVID ward namo naay 30 gahulat from other hospitals, mana mga moderate to severe cases, didto pod sa mga annex namo naa say 30 ka pasyente nga nagahulat,” matud ni Barez.
Gibutyag ni Barez, ang SPMC ang gadawat gyod og mga critical cases sa COVID nga kinahanglang mabutang sa ICU.
“Dili mabalhin sa (private hospital ang mga pasyenteng kritikal) tungod wala silay facility, ang mga hospital biya was not made to cater ng mga ganito na mga sakit nga covid. Ang mga ICU biya usa ra ka place, dili pareho sa SPMC pwedi sila ma-isolate, kay dili pwedi nga ang ICU nimo (para sa Covid) kauban sa ubang pasyente,” matud ni Barez.
Samtang, kadtong mga moderate to severe cases karon matud ni Barez kung stable na ang ilahang mga kondisyon sa ilahang mga sakit, ginabalhin na kini sa usa ka Temporary Treatment and Monitoring Facility ug padayong ginamonitor sa mga doctor usa nila mahuman ang ilahang period sa isolation.
RadyoMaN Aimee Guinita
