Davao City – Gibakwi karon ni Magdalo Partylist representative Gary Alejano
ang kabalaka sa publiko sa gipanday nga National Identification System nga
ginatuki karon sa hawanan sa senado.
Matud ni Alejano nga walay angay ikahadlok ang katawhan sa balaod kay ang
tumong ani ma-integrate ang transaksyon sa lahi-lahi nga buhatan gamit ang
usa ka ID lamang.
Daghan sa mga Pilipino karon walay record sa gobyerno sa iyang pagkatawo
busa dakong tabang ang ID System aron mahingpit ang iyang Philippine
citizenship.
Segun ni Alejano nga ubos sa balaod ang kuhaon lang mao ang personal
information sa pagkatawo sa usa ka Pilipino ug wala na’y lain pa.
Busa kampante ang magbabalaod nga dili malapas ang privacy sa usa ka tawo
gawas lang kun dunay dautang record o pending nga mga kaso sa korte.
Si Alejano nagdugang kinsa usa sa mga principal author sa National ID
System nga kun hingpit kini maba-laod dili na unya maglisod ang Philippine
Statistic Authority (PSA) sa pagkuha sa datos sa populasyon sa tibuok nasud.
Kumpiyansa ang Magdalo representative nga dili magamit sa estado sa
pagbukiki sa personal nga datos ang ID System sama sa pagpaniid sa lihok sa
usa ka tawo nga gidudahan sa otoridad.
Busa malaumon si Alejano nga makaani og dakong suporta sa mga senador ang
pagpasar sa National ID System panahon kun sugdan na ang botohanay niini.
RadyoMaN Joel Viray
