Davao City – Dakung tabang sa barangay kun hingpit mapatuman ang national ID system aron usab daling ma-identipika ang status sa usa ka tawo ilabi na sa mga nagpuyo sa barangay nga dunay mga gipanghimo nga dili maayo kontra sa balaud panggamhanan.
Sumala ni Brgy. 1-A Magallanes Barangay Captain Elpidio Alicaway nga pabor siya sa sugyot balaudnon nga aprobado na sa bicameral conference committee sa Kongreso kalabutan sa national ID system.
Nagtuo si Alicaway nga walay angay kabalak-an ang maong balaud kun hingpit na mapatuman sa nasud, dako ang iyang pagsalig sa mga mambabalaud nga dili maadto sa kadutan ang seguridad sa katawhan bisan sa paghatag sa ilang personal details.
Gidugang ni Alicaway nga ang national ID system mamahimong dili na hasol ngadto sa mga katawhan ilabi na kun adunay ginaproseso ug dili na kinahanglan ug daghan ID nga ipresenta kun gikinahanglan sa usa ka pribado o pampublikong kompaniya.
RadyoMaN Don Pulayao
