Davao City – Paspasan ingon man gahinan og saktong pondo ang planong pagpalambo sa Shrine Hills dinhi sa syudad sa Davao.
Kini maoy panawagan ni Interface Development Interventions Inc. Executive Director Chinkee Golle human wala pa mapasa sa City Mayor’s Office ang naaprubahang amendment sa ordinansa bahin sa Shrine Hills isip Urban Ecological Environment Sub-Zone sa syudad sa Davao diin sa pagkakaron pirma nalang ni Mayor Sara Duterte-Carpio ang kinahanglan.
Segun ni Golle nga kung buot himoong eco-tourism park ang Shrine Hills, kinahanglan nga gahinan kini og saktong pondo sa gobyerno.
Panahon nga maaprubahan na kini sa ehekutibo, mugnaon na ang Urban Ecological Environment Sub-Zone Committee kinsa mag plano sa mga provisions sa maong lugar.
Usa na dinhi ang Privately-Owned, Publicly Open Spaces (POPOS) diin mamahimong i-invest sa mga lumulupyo sa Shrine Hills ang ilang yuta subay sa himoong environmental parks.
Kahinumdoman nga nahimong krusyal ang proseso sa pagpasa sa maong ordinansa sanglit pipila sa mga residente sa maong lugar wala ni-uyon niini ilabi na nga 25% lang ang ilang magamit sa ilang kinatinuk-ang yuta diin ang 75% mamahimong subject sa ecological sub-zone.
RadyoMaN Jason Amisola
