Caso de double murder y frustrated murder el planta contra con un construction worker despues este ya mata consu suegra y cuñao na Pasonanca del Lunes por la noche.
Con el hechor ya conose como si Joel Onggon y Puyat, 30, casao y native de Ipil, Zamboanga Sibugay.
Si Onggon ya lancia y ya mata consu suegra nombrao como si Maria Fely Agustin Ramirez, 48, casao y consu cuñao su Pedie Agustin Ramirez, 30.
Mientras el menor cuñao si Jay-ar Agustin Ramirez, 26, na critical condicion na hospital este maga tiempo.
El incidente ya sosede amediante tomao si Onggon.
Asegun ta manda si Fely dale mama consu hija que ez esposa di Onggon, con el diila Nuevo nacido anac cuando ya contesta mal contestao conele si Onggon.
Ya tene que man purpiajan si Onggon y su suegra hasta ya entra tambien si Pedie hablando calya ya lang sila y continua man cuento ala maniana.
Pero ya rabya si Onggon y ya lancia ya lang este con Pedie.
Cuando ya tumba si Pedie, ya precura pa afasigua si Fely pero hasta conele ya lancia tambien si Onggon.
Ya entra tambien para afasigua si Jay-ar pero hasta coneletambien ya lancia si Onggon.
Con el maga victima ya lleva na hospital pero canda Fely y si Pedie ya despidi mientras si Jay-ar na critical el condicion.
Con Onggon ya aresta el maga vivientes y ya entrega na pulis.
