Davao City – Kasong 2 counts of parricide ug frustrated murder ang giduso batok sa suspek nga nitigbas-patay sa iyahang apohan nahitabo biyernes sa gabii sa Purok 1-B, Brgy. Del Monte, Samal District, Island Garden City of Samal (IGACOS), samtang nakagawas na sa hospital ang uyuan ug silingan sa suspek nga samdan usab sa sa maong insidente.
Sa interbyu sa RMN Davao kang P/MSgt. Hellie S. Jovellano sa IGACOS PNP, nalisuan matud pa sa iyahang pangisip ang 24 anyos nga suspek nga si Arjay Lopez Gevana human wala mahatagi og kwarta.
“Kung atoang i-analyze ang insidente ang pinaka-prime gyod nato na cause of the incident ang iyahang mental illness and then secondary tong other circumstances,” segun ni Jovellano.
Sa imbestigasyon sa kapulisan, niadtong biyernes nagpakitabang ang usa sa mga biktima nga si Marlon Rafael, silingan sa suspek diin sumala sa biktima iyahang giadtuan ang panimalay sa magpamilya sa dihang nakadungog kini og kasikas gani nagkatagbo sila sa dalan sa suspek nga walay sanina ug nagdala’g lagaraw.
Gipangutana niini ang suspetsado kung unsay problema, apan kalit usab kining gitigbas sa ulo ug li-og diin ang biktima midagan ug nakapangayo’g tabang.
Girespondehan sa mga awtoridad ang insidente ug nakaplagang wala nay kinabuhi sulod sa panimalay ang mga apohan nga sila Alejandro Gevana, 87 anyos ug Leona Lopez Gevana, 84 anyos samtang naluwas ang uyuan nga si Mario Lopez Gevana nga nakahiagom usab og samad tinigbasan.
RadyoMaN Aimee Guinita
