Pagadian City – Pormal ng gipagawas sa Department of Health ang ihap sa mga natalang kaso sa dengue dinhi sa Zamboanga Peninsula lakip na ang Isabela City, Basilan kagahapong adlawa. Kini atol sa Media Forum nga gipahigayon kagahapong adlawa dinhi sa syudad sa Pagadian.
Sa datos sa DOH Regional Research Epidemiology and Surveillance Unit, mikabat na sa 2, 767 ang suspected dengue cases gikan sa unang adlaw sa bulan sa Enero hangtud Abril 11, ning tuiga. Misaka sa 142 porsyento ang ihap sa mga kaso sa dengue karong tuiga kung ikompara kaniadtong tuig 2018.
Sigon ni Wilfred Agtina, ang Provincial Disease Surveillance Officer nga ang probinsya sa Zamboanga Sibugay ang adunay pinakataas nga pagsaka sa kaso sa dengue nga miabot sa 420 porsyento samtang dinhi sa probinsya sa Zamboanga del Sur misaka sa 33 poryento karong tuiga kung kompara niadtong niaging tuig.
Gidugang ni Agtina, 54 porsyento kon majority sa mga natakbuyan sa dengue mao ang mga lalaki samtang 49 posyento naglangkob sa mga nag edad ug 1 hangtud 11 anyos.
