Pagadian City – Ang RMN-DXPR Pagadian 603 nagsaulog karong adlawa sa iyang ika-40 ka tuig nga annibersyo kun ika-upat ka dekada sa serbisyo publiko pinaagi sa nag-unang balita, komentaryo ug drama sukad sa pagsugod niini niadtong tuig 1980 .
Ang DXPR Pagadian , nahimugso niadtong Enero 10, 1980 pinaagi sa inisyatibo ni Don Henry Canoy ug apil sa dul-an 70 ka AM ug FM radio station nga gitukod sa RADIO MINDANAO NETWORK, INC KUN RMN nga giilang pinakadako nga radio network sa tibook nasud pilipinas.
Daghanang nang nibanos sa pagdumala sa RMN-DXPR Pagadian sa nanglabay nga katuigan diin ang pagpangalagad wala lang gi-angkla pagpanibya sa kahanginan kundili pinasikad usab sa serbisyo publiko sama sa Medical Mission, Feeding Program, Libreng Sakay, pagtunol sa hinabang sa mga nabiktima sa kalamidad ug ang paglingaw sa katawhan pinaagi sa Radyo Saya sa kabarangayan.
Isip pagpasalamat sa labaw nga makagagahom ipahigayon alas 9:00 karong buntag ang santos nga misa pinaagi ni Rev. Fr. Pat Dalumpines, ang padre kura sa parokya sa San Jose ning syudad nga himoon sa RMN-DXPR Pagadian Compound ug live nga mabati sa kahanginan alas 9:00 karong buntag.
Ubos sa pagdumala sa RMN president ug chairman Sir Eric Canoy, gipiyal ang RMN-DXPR Pagadian kang Station Manager Melchor Coronel, ug nitunol sa pasalamat walay puas nga suporta sa mga tigpaminaw sukad kaniadto hangtud karon.
Gipahi-uyon usab sa sibyahan ang iyang serbisyo niining panahon pinasikad sa social media aron masiguro nga mapaabot sa tanang panahon ang serbisyong tatak RMN.
