Naisumite na ni House Secretary General Cheloy Garafil sa tanggapan ng House Speaker ang ikalawang impeachment complaint laban kay Pangulong Ferdinand “Bongbong” Marcos Jr. na inihain ng iba’t ibang progresibong grupo at inendorso ng Makabayan Bloc.
Kinumpirma ito ni House Deputy Minority Leader at ACT Teachers Party-list Rep. Antonio Tinio na kasapi ng Makabayan Bloc.
Ayon kay Tinio, si House Speaker Faustino Bodjie Dy III mismo ang nagsabi nito sa kanila.
Diin ni Tinio, binanggit ni Speaker Dy na iniatas niya na maisama ang ikalawang impeachment complaint sa Order of Business sa plenary session ng Kamara ngayon.
Tatlo ang articles of impeachment na nakapaloob sa reklamong impeachment ng Makabayan Bloc laban kay PBBM na kinabibilangan ng sistematikong korapsyon, pag-abuso sa paggamit ng unprogrammed appropriations, at direktang pagkakasangkot sa kickback schemes.
Binanggit sa reklamo ang umano’y “Baselined-Balanced-Managed” o BBM Parametric Formula ng Department of Public Works and Highways (DPWH).
Sa naturang formula ay ginagamit umano ang initials na ‘BBM’ ng pangulo para tukuyin ang mga presidential at congressional infrastructure project allocations sa ilalim ng pambansang budget na basehan din ng mga kickback.
