Pagadian City – Moarangkada na sugod karong adlawa ang pagpangbakuna batok polio sa mga kabataan nga nagpangidaron ug 59 ka bulan o 5 anyos paubos dinhi sa probinsya bisan pa man taliwala sa COVID-19 pandemic. Sa anunsyo sa Department of Health pinaagi sa National Immunization Program nga gikatakdang magpadayon na ang pag-implementar sa ikatulong round sa Sabayang Patak kontra Polio sugod karong adlawa hangtud na sa Agusto 2, 2020.
Miawhag si Dr. Anatalio Cagampang Jr., ang OIC sa Integrated Provincial Health Office (IPHO) ngadto sa mga ginikanan nga adunay mga bata nga nagpangidaron ug 5 anyos paubos nga dili magdumili sa pagpabakuna batok polio bisan pa man kon kanhi nabakunahan na kini. Angay sayran nga ang polio usa ka makatakod nga sakit nga gikan sa kagaw nga poliovirus.
Mamahimo kining hinungdan sa pagkabaldado sa tawo ug possible pang ikamatay. Niining kasamtangan, wala pay tambal alang sa polio ug ang pagpabakuna lamang mao ang pinakaepektibong pamaagi sa pagpakgang niini.
Gipaklaro usab ni Dr. Cagampang nga walay angay kabalak-an gumikan kay luwas, epektibo ug walay overdose ang Oral Polio Vaccine (OPV) bisan pa man kung adunay nasinatiang ginagmayng hilanat, sip-on ug ubo ang bata.
Sigon sa IPHO, arun makapahimulos sa Oral Polio Vaccine (OPV), moduol lamang sa mga health workers, sa mga personahe nga gitahasan sa pagbisita sa matag panimalay arun sa pagbakuna, o di kaha ngadto sa mga health centers, pampublikong tambalanan ug sa uban pang dapit kon diin gimontar ang special vaccination areas sama sa selected restaurants, mall, ug sa pampublikong terminal.
