Davao City – Gipasalig karon ni Department of Social Welfare and Development (DSWD) Undersecretary Luzviminda Ilagan nga gipahigayon karon ang makuting review sa talaan sa mga benepisyaryo sa Conditional Cash Transfer (CCT) kun Pantawid Pamilyang Pilipino Program (4Ps).
Sa pakighinabi kaniya sa morning primetime radio social commentary program nga ‘Straight to the Point’ uban ni RadyoMan June Duterte, gibutyag ni Ilagan nga agig tubag sa mga alegasyong ‘loopholes’ kun mga kahuyangon sa maong programa gilusad gilayon sa gobyerno ang review ug evaluation sa listahan sa mga intended beneficiaries.
Matud sa maong opisyal kinsa nahimo usab nga kanhi GABRIELA partylist representative ug long-time City Councilor sa Davao City, adunay moratorium sa pagdugang sa mga recipients aron pagsuta sa kun kinsay angay tangtangon na sa programa gumikan kay na-serve na niini ug kinsa kadtong dili usab kwalipikado apan nalakip sa talaan kaniadto sa wala matinong rason.
Gitataw ni Ilagan nga ang 4Ps usa lamang gayud ka matang sa ‘pantawid’ kun ‘bridging or transition program’ busa dili kini masaligan hangtud sa hangtud.
Dili usab pwede ang ‘doleout’ kun direktang hinabang maoy hinungdan nga giduso gayud sa pamunuan nga gikinahanglan gayud ang alternatibong panginabuhian kun livelihood programs haron mas sustainable ug mabatonan ang mas komprehensibong kasulbaran sa suliran sa gitawag nga ‘poorest of the poor’ sa atong katilingban, segun sa DSWD official.
RadyoMaN June Duterte
