Hinimok ng Gabriela Youth ang Commission on Elections (Comelec) na idiskwalipika na ang Duterte Youth Party-list dahil umano hindi nito kinakatawan ang mga kabataan.
Kaugnay nito, nagpadala na ng sulat ang nasabing grupo kay Comelec Chairman George Erwin Garcia para hilingin sa komisyon ang agarang pagpapadiskwalipika sa Duterte Youth Party-list.
Naniniwala ang grupo na kung madi-disqualify ang Duterte Youth Party-list, mabibigyan ng upuan sa Kamara ang umano’y totoong kumakatawan sa marginalized sektor.
Iginiit ni Francheska Reyes, spokesperson ng Gabriela Youth na dapat hindi pinagbigyan ng Comelec na tumakbo ang Duterte Youth dahil hindi umano sila rehistrado.
Mga militar, pulis at government state agents din umano ang kinakatawan ng mga naturang party-list, hindi ang mga kabataan.
Matatandaan na unang humiling ng Temporary Restraining Order ang Duterte Youth Party-list sa Supreme Court para kwestiyunin ang naging desisyon ng Comelec na umupong National Board of Canvassers matapos suspendihin ang kanilang proklamasyon.
