Nag-abiso ang lokal na pamahalaan ng Caloocan na isasara ang ilang kalsada malapit sa Bonifacio Monument Circle (BMC).
Isasara ito simula mamayang alas-11:00 ng gabi bilang bahagi ng traffic management plan para gunitain ang ika-161 na anibersaryo ng kapanganakan ni Gat. Andres Bonifacio.
Kasama sa pagsasara ng kalsada ang MacArthur Highway mula kanto Calle Cuatro hanggang Monumento at Samson Road mula kanto Lapu-Lapu Street hanggang Monumento.
Isasara din ang mga kalsada sa kahabaan ng Rizal Avenue mula sa kanto ng 10th Avenue hanggang Monumento, at sa kahabaan ng EDSA Northbound mula General Rosendo Simon hanggang Monumento.
Ang lahat ng apat na ruta ay muling magbubukas matapos ang isasagawang programa.
Pinayuhan nito ang mga motorista na dumaan muna sa mga alternatibong ruta upang maiwasan ang abala.
