Nagsumite ang Independent Commission for Infrastructure (ICI) ng Interim Report sa Office of the Ombudsman, kaugnay ng sinasabing large-scale corruption at fund diversion sa Department of Public Works and Highways (DPWH) flood-control program.
Base ito sa imbestigasyon ng Komisyon nitong September 2025, hinggil sa anila’y sabwatan ng ilang mambabatas, DPWH officials, at private contractors sa pondo para sa flood-control projects.
Ayon kay ICI Chair Andres Reyes Jr., base sa sinumpaang affidavits at mga ebidensya na kanilang nakuha mula kina dating DPWH officials Engr. Henry Alcantara, Engr. Brice Ericson Hernandez, at Engr. Jaypee Mendoza, nakita ng Komisyon ang anila’y systematic “kickback scheme” kung saan ang ilang mambabatas na proponents ng proyekto ay nagsingit ng pondo sa National Expenditure Program (NEP), House General Appropriations Bill (HGAB), at General Appropriations Act (GAA).
Ito ay kapalit daw ng 20% hanggang 30% ng project costs, kung saan ang bayad ay sinasabing idinaan sa DPWH engineers at contractors na siyang nanguna sa project awards.
Inihayag din ng ICI na base sa testimonya ng mga dating DPWH officials, ang mga proyektong ginawa ay substandard.
Kabilang sa mga inirekomenda ng ICI na kasuhan ng paglabag sa Anti-Graft and Corrupt Practices Act Plunder Law sina Senators Joel Villanueva at Jinggoy Estrada, dating Congressman Elizaldy Co, dating Congresswoman Mary Mitzi Cajayon-Uy; dating DPWH Undersecretary Roberto Bernardo, at Commission on Audit (COA) Commissioner Mario Lipana.
