IGBARAS, Iloilo – Ginraid sang national museum upod ang mga opisyal sang Igbaras sa pagpanguna ni Mayor Jaime “James” Esmeralda, mga katapo sang militar kag kapulisan ang ginareklamo nga treasure hunting site sa Brgy. Pasong, Igbaras, Miyerkules sang hapon, Pebrero 5.
Suno kay SB member Vincent Robles sang Igbaras, ila lang na-abtan si alyas Bern nga amo ang nagabantay sang mga kagamitan sa site nga ginalakipan sang generator set, mga lubid kag flashlights.
Ila man nakit-an ang ginakutkot nga buho nga nagalapad sang 5 x5 meters kag ginabulubanta 80 ka tapak nga kadalumon.
Ginpahayag ni Bern nga anum sila ang nagakutkot kag ginasweldohan sang P2,500 kada semana.
Ginsaysay ni Bern nga isa ka pastor ang permittee nga si Noly Laquihon Bayogos kag may simbahan sadto sa nasambit nga lugar.
Apang nagluntad ang landslide sang 2013 rason nga naguba ang kapilya.
Dugang pa ni Bern nga ang isa ka mga sumulunod nga si Leonora Escauriasa amo ang tag-iya sang duta kag makaligad ang pila ka bulan, ang iya bana may gindala nga hapon nga may device agud matultulan ang treasure.
Suno kay alyas Bern nga may na-locate ang mga ini sa landslide area gani ila ginbalikan kag ginkutkot sa sulod na sang kapin isa kag tunga sa tuig.
Apang ginpahayag ni Bern nga wala pa sila sang may nakuha nga Yamashita treasure kag napaslawan nga makakuha sang bulawan sa lugar baliskad sa nagalapta nga impormasyon nga may nakuha ang mga ini nga tibud.
Sa karon ginpauntat na ang nasambit nga aktibidad kag ginapatawag sa opisina ni Igbaras Mayor James Esmeralda ang permittee nga si Noly Laquihon Bayogos agud usisaon.
Una na nga nag-issue sang cease and desist order ang National Museum kay Bayogos matapos natukiban nga ang iya gina-uyatan nga permit ang wala napartineser sa Brgy. Pasong, Igbaras kundi sa Carranglan, Nueva Ecija.
Nagalaum naman ang mga pumuluyo sa lugar nga masolbar na ang madugay na nila nga ginareklamo pati na ang ginakahangaw-an nga pag-usmod sang duta ukon pagluntad sang landslide.
Photo © SB Vincent Robles
