Padayon nga gina-engganyo sang lokal nga panguluhan sang siyudad ang mga pumuluyo sa kabarangayan nga magpaninlo sang palibot agud malikawan ang pagmu-ad sang lamok nga nagadala sang balatian nga dengue hemorrhagic fever.
Ini ang panawagan sang siyudad angut sa pagsulod na sing tig-ululan nga ginalauman magadamu naman ang mga lamok nga carrier sang dengue.
Sa karon, base sa data sang City Health Office, may kabug-usan nga 150 ka kaso sang dengue ang narecord humalin sang Enero tubtub sang bulan sang Mayo sini nga tuig.
Mas manubo ini sang 74% ikumparar sang nagligad nga tuig nga naglab-ot sa 585 ang kaso sang dengue sa kasubong nga panahon.
Apesar sini, ginapahanumdum sang city government nga dapat andaman gid ang posible pagtaas sang kaso sang dengue karon nga nagapasulod na ang tingulan kon sa diin may ginahalungan pa kita nga covid-19.
