Report ni: Jennifer Palomo Debaja
Isa na naman ka trahedya sang pagkalumos ang nag-utod sa kabuhi sang isa ka Ilonggo nurse sa New Zealand.
Ginkilala ang biktima kay Kenny Cordova Espinosa, 26 anyos kag isa ka Ilonggo.
Sa panaysayon sang flatmate ni Kenny nga si Mary Batayola , Enero 11, 2019 sang nag hagaray si Kenny kag mga workmates sini nga mag road trip sa Whangarei para sa ila summer outing.
Matapos ginbisita ang bantog nga Mermaid Pool sa Matapouri, nagpadulong na sila sa Whangarei falls , isa sa pinaka matahum nga tourist attraction sa New Zealand.
Dugang ni Batayola, una nga ginhagad ni Kenny ang klasmeyt nga si Benjamin para mag swimming kag bisan namalibad ini sa umpisa, gin updan man sini si Kenny tungod sa padayun nga pagpamilit.
Tungod sa nabatyag nga kakapoy nagpahuway sa kilid sang busay si Benjamin samtang padayun naman sa paglanguy si Kenny. Kag sang yara na ini sa tunga, nakita nalang ini ni Benjamin nga nabudlayan na sa paglangoy kag naga amat amat na sarurot sa tubig.
Nagbulig pa ang pila ka turista nga natabuan sa insidente apang asta kinapoy lang sila wala gid ini nakit an si Kenny.
Sa ginpatigayon nga search sang Professional Team sang Wellington Rescue Divers, naretrieve ang bangkay ni Kenny pagkasunod nga adlaw Enero 12, 2019.
Isa ka registered nurse si Kenny kag nag obra man ini bilang nurse sa Saudi Arabia sang tuig 2015 kag gin aku ang responsibilidad sa iya mga utod sang napatay ang ila ginikanan. Antis paman matapos ang iya kontrata sa Saudi, gintinguhaan sini nga makakuha sang diploma course para sa New Zealand. Paagi sa bulig sang isa ka Immigration Consultancy sa Iloilo, natigayon kag na approve ang visa ni Kenny sang Marso 2018.
Antis paman ang insidente, naka process na kuntani ang Competency Assessment Programme ni Kenny bilang overseas registered nurse.
Nagpahayag naman ang Department of Foreign Affairs (DFA) nga nagacoordinate na ang Philippine Embassy sa New Zealand sa proper authorities para sa visa issuance sang utod ni Kenny.
Sa karon, yara na sa Auckland Funeral Services ang bangkay ni Kenny kag ginahulat nalang ang pag abot sang iya girlfriend kag utod para sa cremation sang iya bangkay.
