Bacolod City – Ara na sa paghinakop sang Women and Children Protection Desk (WCPD) sang Central Visayas (Region 7) ang isa ka iloy matapos ini ang gindakop sang mga operatiba sang Bacolod City Police Office WCPD, intelligence personnel lakip sang WCPD Central Visayas sang nagligad nga Biyernes, matapos natukiban nga ginagamit niya ang iya menor de edad nga bata para kuhaan sang video kag litrato nga hublas kag ini ang ginabaligya online.
Ang iloy nga ginahinago lang ang pangalan, ang nagapang-idaron sang 30 anyos ang may ara sang tatlo ka mga kabataan nga mga babaye sa diin ang magulang ang naga-edad na sang 11 anyos.
Natukiban ang modus sang iloy sang nadakpan ang isa ka foreigner sa Estados Unidos, sa diin narecover ang laptop nga may unod sang hublas nga videos kag litrato sang menor de edad nga bata, kag sa ulihi sang gin-usisa, ini ang nagikan sa isa ka lugar sa Barangay Handumanan, syudad sang Bacolod.
Sang ginkadtuan sang dyHB ang lugar, ang balay sang mag-iloy ang himo sa light materials sa diin suno sa mga kaingod, napatay na ang bana sang babaye sang nakaligad nga tuig, kag siya nalang ang nagasagod sa iya tatlo ka bata nga babaye paagi naman sa pagpanglabada.
Posibli desperado na ang iloy sa ila nga pangabuhi, kag bangod sa kapigaduhon rasun nga nahimo nya nga ibaligya ang mga hublas nga litrato kag video sang iya nga bata sa internet.
Suno sa report, mismo ang iloy ang naga-upload sa amu nga mga videos kag pictures sa website nga ginamaintain man niya.
Ang mga kabataan niya ang ara na sa paghinakop sang Department of Social Welfare and Development (DSWD).
