Davao City – Hangtod karon wala pay matumbok nga mga suspek sa pagpusil patay sa kanhi Kapitan ang mga imbestigador sa Buhangin PNP.
Wala pay cartographic sketch ang mga otoridad sa mga mamumuno nga mibugha kang kanhi Barangay Communal Kapitan Arnold Maalat pasado nahitabo alas-3:00 sa hapon niadtong adlaw’ng Sabado.
Subay sa pamahayag sa mga nakasaksi sa krimen, misakay ang mga suspetsado sa ilang XRM motorcycle nga dunay color nga pula ug itom apan walay plaka ug nagpaturatoy og padagan paingon sa Diversion Road human nasiguro nga patay na ang kanhi kapitan.
Suwayan susihon sa mga imbestigador ang CCTV camera nga naka montar sa sabungan kung nakuhaan ba og dagway ang duha ka armado dihang ilang gipatay si Maalat.
Nasayran nga patabok na unta ang biktima kauban ni Juleto Cayunda dihang gisundan sila sa mga suspek dayon gipusil sa makatulo ka higayon si Maalat gamit ang .45 nga pistola.
Gideklarang patay sa Central 911 Medic Team ang biktima gumikan sa nahiagomang duha ka samad sa likod ug usa sa likod sa ulo.
Nasuta nga bag-ong gawas gikan sa detention cell ang biktima gumikan sa kasong may kalapasan sa Republic Act 9165 tuig 2017 diin mao usab kini ang usa sa gitutokan sa imbestigasyon sa kapulisan.
RadyoMaN Joel Viray
