iFM Laoag – Agtultuloy paylaeng ti imbestigasyun nga isaysayangkat iti Commission on Audit (COA) mainaeg iti mapukpukaw a pundo iti siudad ti Laoag nga umbaot iti nasurok kumurang 90 a million a pisos, talo a tawenen ti naglabas.
Masdaaw unay dagiti kameng ti Sangguniang Panlalawigan iti sungbat ti COA central office iti resolution nga inpatulodda itay napalabas a bulan.
Kinuna ni Bocal Davinci Crisostomo, Chairperson ti Committee on Laws, a saanda ninamnama a kasta ti maawatda a sungbat ti COA a kasapulanda ti umdas a panawen nga aginbestigar iti pannakapukaw ti 90 a milyon a pisos a pundo iti Laoag City Government.
Ti Sang Panlalawigan ti nangipasa iti resolution a naiturong iti COA Commissioner a nangammoanda nu ana ti resulta ti imbestigasyonda iti issue iti Laoag City.
Malagip nga idi Hunyo tawen 2016 a nairuar ti pannakapukaw ti maipagarup a 90 a milyon pesos a pundo iti nadakamat a siudad a nangisayangkatan dagiti taga COA regional ken central office ti imbestigasyon kageddan ti panagalada iti dokumento iti City Treasurers Office ngem aginggana kadagitoy a gundaway, awan pay ti paglawlawagan iti nasao a banag.
Bernard Ver, RMN News
