Davao City – Ang pagkatawo ni Hesu-Kristo dinhi sa kalibutan kapin dos mil na katuig katumanan kini sa panaad ug plano sa Dios nga iyang luwason ang iyang katawhan gikan sa sala ug kamatayon.
Gitagna ni propeta Isaiah nga magpakatawo ang Dios sa kalibutan ug kini natuman human nagpahibalo ang anghel kang Maria nga manganak kini og batang lalake pinaagi sa Balaang Ispiritu ug tawagon nga ‘Immanuel’.
Ang pulong nga ‘Immanuel’ nagpadayag sa duruha ka personalidad ni Kristo nga siya tawo apan matuod nga Dios diin sa Hebrew word ang “EL” nagpasabot kini nga Elohim ug ang “Immanu” nagpasabot nga tawo nga sa ato pa ang Dios uban kanato.
Sumala ni Brethren Evangelical School of Theology Founder ug President Bishop Ariel Coleto ang pagka-tawo ni Kristo naghatag og paglaum, kapasayloan, ug kaluwasan sa mga makasasala human sa 400 silent years sa Dios.
Sigun ni Bishop Coleto, Divine Personal Decision sa Dios nga magpakatawo aron mupuyo uban sa mga makasasala kansang misyonhon katuyuan mao ang pagluwas sa iyang katawhan gikan sa kamatayon sa impiyerno.
Nasubo si Bishop Coleto kay gihimo na nga komersiyo ang pagpakatawo sa Dios ug nawala ang isinsiya sa mensahe sa pasko ug napadaplin si Kristo inay mas napasidunggan sa mga tawo karon si Santa Claus.
Mas gikaguol pa og maayo sa obispo kay bisan ang mga kristohanon karon nalamoy na sab sa tradisyon ug naandan sa kalibutan nga kun walay material nga regalo dili magmalipayon imbis nga magsadya kay ang Dios nakig-uban na sa mga tawo.
Ug mao kini ang hinungdan ngano wala matagamtami sa kadaghanan ang pagka-Immnauel sa Dios sa ilang mga kinabuhi sanglit daw padayon sila gibutahan ni Satanas.
Mga kasama, angay pasalamat ang Dios ug dili si Santa Claus kay kung wala nagpakatawo ang Ginoo sa kalibutan hayan wala kita’y maangkon nga kaluwasan inay kalaglagan sa impiyerno ang atong padulngan isip silot sa Dios.
RadyoMaN Joel Viray
