Sugdan na ang implementasyon sa pagdili na ug gamit sa plastic dinhi sa dakbayan sa Iligan sugod karong adlawa, septembre dise sais.
Kini mao’y gipaklaro sa Chairman sa Solid Waste Management & Environment sa hawanan sa konseho nga si City Councilor Noli Pardillo.
Matud sa konsehal pormal nang ipatuman ang city ordinance # 19-6814 o ang pagdili na sa pag-gamit sa single use plastic ug styrofoam dinhi sa dakbayan sa Iligan.
Hinoon gipaklaro sa konsehal nga adunay tulo ka bulan nga transition period niini nga kutob sa bulan sa Disyembre aron dili usab maahat ug makuratan ang katawhan .
Boot pasabot niini nga gikan sa Septembre 16 taman sa Disyembre 16 wala pay ipatuman nga multa, apan paglapas sa maong adlaw ipahamtang na ang tukmang multa basi sa nakalatid sa ordinansa.
Busa tungod niini nag-awhag si konsehal Pardillo nga mo kooperar lang ang katawhan sa pagpatuman sa nasangpit nga ordinansa.
