Manila- Padayon sa gihapon ang pagtaas sang presyo sang galunggong bangud sa kakulangan sang suplay gani nga nadesisyonan sang gobyerno nga mag-import sini.
Ini matapos nga ginpirmahan na ni Department of Agriculture (DA) Secretary Manny Piñol ang certificate of necessity okun ang pahanugot nga mag-import sang galunggong halin bulan sang Setyembre tubtob ulihi nga adlaw sang Disyembre. Nahibaluan nga ang isda nga galunggong amu ang isa sa pinakanagmahal sa mga isda nga ginabaligya sa merkado.
Suno sa Bureau of Fisheries and Aquatic Resources (BFAR), umpisa na ang “lean months” gani lauman nga maganipis ang suplay sang mga isda bunga sang malain nga panahon.
Ginpahayag dugang ni BFAR Director and Agriculture Undersecretary Eduardo Gongona, may posibilidad nga ang mga *isda nga imported halin sa China okun iban nga pungsod ang halin pa diri mismo sa kadagatan sang Pilipinas partikular sa West Philippine Sea*. Samtang tubtob lamang sa 17,000 metric tons ang mahimo nga i-import nga dapat dal-on deretso sa wet markets.
