Davao City – Ang atong ugma dili matagna ug bugtong ang Ginoo lamang ang nasayud niini. Bisan pa man niini, dagha’g mga rason kun hinungdan nganong musangpot sa kamatayon ang usa ka indibidwal.
Subay sa datus sa World Health Organization (WHO) daghang mga rason kun nganong mamatay ang usa ka tawo. Pipila niini mao ang natural death, aksidente, suicide, homicide ug daghanan pang uban.
Niadto lamang Oktubre 16, 2019 sa dihang miigo ang Magnitude 6.3 nga linog sa Tulunan, North Cotabato nga gisundan pa sa daghang aftershocks nga gikamatay sa pipila ka indibidwal.
Ug niadto lamang Oktubre 29, 2019 sa dihang miigo sa susamang lugar ang mas kusog pa nga linog nga miabot sa Magnitude 6.6 ug miresulta sa pagkamatay sa usa ka estudyante sa Davao del Sur ug aduna usay pipila ka patay sa Cotabato.
Mangilngig usab nga panghitabo mao ang disgrasya sama sa Maco road crash niadtong Oktubre 21, 2019 diin 3 ang deklaradong patay human nagkarambola ang tulo ka mga sakyanan.
Usa usab sa mga hinungdan sa kamatayon mao ang seryosong problema sa depresyon nga muresulta sa paghunos sa kinabuhi kun suicide.
Sumala ni Precious Manliguez, director sa Philippine Mental Health Association (PMHA) Davao chapter sa milabay nga tuig, natala ang taas nga kaso sa suicides kun paghikog diin sa pagkakaron mi-ubos ang ihap niini apan anaa gihapoy mga kaso sa suicide attempts.
Sa Pilipinas, anaa sa ika-tulo nga ranking ang suicide sa hinungdan sa kamatayon sa tawo.
Aron malikayan ang maong insidente,m kinahanglan nga adunay suporta sa iyang palibot ang usa ka tawo nga nanginahanglan niini.
“Naa gyud tay social support. Not necessarily pamilya ang musuporta sa atoa. Pwede kauban sa trabaho, pwede classmate, pwede amigo, kababata, silingan. Dili necessarily nga family pero kung naay pamilya mas maayo,” saysay ni Manliguez.
Gawas sa mga aksidente kun disgrasya sa dalan, ang suicide ang seryosong sitwasyon nga mamahimo pang kapugngan.
Sa Bibliya, nag-ingon ang pulong sa Ginoo nga siya ang ‘author’ ug ‘sustainer’ sa atong kinabuhi rason nga kinahanglan nato kining ampingan ug gamiton sa sakto alang sa Iyang kahimayaan.
RadyoMaN Kirby Manzon
