Davao City – Nakonsensya ug misurrender sa Barangay ang inahan sa baby girl nga napalgang naglutaw nga wala nay kinabuhi sa sapa sa Kapalong, Davao del Norte.
Sa eksklusibong interbyu sa DXDC RMN Davao sa hepe sa Kapalong Municipal Police Station nga si Police Major Ruth Diaz, gibutyag niini nga human nakit-an ang patay’ng lawas sa bata sa hiniusang pwersa sa kapulisan ug barangay officials sa lugar, gipangita nila ang inahang responsable aron matagaan og hustisya ang kamatayon sa bata.
Mipatim-aw ang 22 anyos nga suspek ug mitug-an sa mga awtoridad nga nahimo niya ang paglabay sa iyang anak sa sapa human niya gihimugso tungod sa kahadlok nga mahibaloan sa iyang ginikanan nga nabuntis kini sa ikaduhang higayon nga walay miangkong amahan hinungdang nahimo niya ang krimen.
Base sa spot report, alas 10:00 sa buntang niadtong Oktobre 24, 2020 adlaw’ng Sabado, sa balay sa iyang bayaw nga anaa nahimutang sa daplin sa sapa nagbati ang suspek.
Dali kining miadto sa sapa ug didto niini gihimugso ang bata ug iyang gipaanod sa tubig hinungdan nga nalumos ug namatay.
“Intentional gyod, kung wala kay intention nga patyon nimo ang bata at the first place nanawag naka og tabang. It takes pa og pila ka days nga bago niya na-realize ug siguro nakonsensiya na daw siya,” sumala ni Diaz.
Kasong infanticide ang gipasang-at batok sa suspek.
Matud ni Diaz, gipasalig sa opisyales sa Barangay Sampao, Kapalong, Davao del Norte nga motabang sila sa pagpahiluna ug sa paghatod sa ulahing kapahulayan sa mipanaw nga si Baby Girl.
RadyoMaN Aimee Guinita
