Tukuran, Zamboanga del Sur – Kasamtangan nga gipa-ilalom karon sa counseling sa Municipal Social Welfare Office ang inahan sa batang babaye nga nisilot sa iyang kaugalingon nga anak pinaagi sa pagpaluhod niini sa baga sa lungsod sa Tukuran ning probinsya sa Zamboanga del Sur.
Una nang nanangayo og pasaylo ang nanay sa 8 anyos nga bata ug nisaad nga dili na niya usabon ang pagpasakit sa iyang anak.
Mahinumduman nga gipaluhod sa baga ang bata dihang pauli og sayo gikan sa tulunghaan busa nagduda ang inahan nga wala kini misulod sa klase.
Sumala sa saysay sa bata, gisugo matud pa siya sa iyang inahan nga mobalik sa eskuwelahan aron kuhaon ang gamit nga gibilin sa ekwelahan.
Busa nagdangoy-ngoy ang bata nga nibalik sa tulunghaan apan wala niya madala ang gamit kay sirado naman ang ilang classroom.
Didto na niulbo ang kasuko sa inahan og gipaluhod sa baga ang bata isip silot niini.
Samaran og tuhod ug wala na makasulod sa eskuwelahan kay oothpaste lang man ang tambal nga gidapat sa pasu sa bata rason nga natingala ang magtutudlo ug principal busa ila kining gibista ug dinhi na nasaksihan ang pait nga kahimtang sa bata.
Mihangyo ang inahan nga dili nalang siya pasakaan og reklamo ilabina nga mabdos kinig pito ka bulan.
Sa pagkakaron ang bata nagpa-alim sa poder iyang apohan.
