Nagpatabang sa RMN DXCC ang usa ka inahan sa usa ka dose anyos nga bata aron nga matagaan og artificial nga tiil ang iyang anak.
Matud sa inahan nga si Gemma Cabigquez- nga since birth na ang sitwasyun sa iyang anak nga deperensiya ang kamot ug tiil ug pilit ang dila sa alingag-ngag niini busa ila kining gipangitaan og pamaagi nga maoperahan.
Dugang pa sa inahan nga normal man ang uban niya nga mga anak, gawas lamang sa manghud niini nga adunay deperensiya sa mata ug kining si alyas ‘’jonathan’’
Tungod niini, buot karon sa inahan nga matagaan og artificial nga tiil ang iyang anak, aron nga dili na kini mag-arikingking sa paglakaw, ilabi na nga usa kini ka estudyante.
Samtang bisan og adunay deperensiya ang mga kamot sa 12 anyos nga si Jonathan, apan makahimo pa kini sa pagkapot sa ballpen ug pagsulat.
Matud sa inahan niini nga si Mrs. Gemma Cabigquez nga pigkit sa iyang anak ang iyang duha ka mga kamot aron nga makasulat sa tunghaan.
Nasayran nga kasamtangan nga nagtungha isip grade 4 student sa Macasandig Elementary School si Jonathan pinaagi sa suporta sa iyang pamilya.
Nasayran usab nga sapipihon kanunay sa inahan ang iyang anak hinungdan nga nagpatabang kini sa DXCC.
