Davao City – Mapasaylo apan kinahanglang tubagon sa suspek ang krimen nga iyang gibuhat.
Kini ang gibutyag ni Rebecca Tero, inahan sa maestra nga si Teresa Mae Tero, 34-anyos, nagtudlo sa Mawab, Compostela Valley Province nga gidunggab-patay sa usa ka Inn sa Tagum City, Davao del Norte niadtong Lunes, July 1, 2019.
Sa interbyu sa DXDC RMN Davao sa inahan niini, wala siya nagtuo nga nabuhat kadto sa suspek nga si Charlene Joyce Cruda Ang, 38-anyos, miyembro sa LGBT nga gikarelasyon sa iyang anak diin selos ang gitudlong hinungdan sa nabuhat niining krimen.
“Kana lang magselos sa iyang mga best friends. Bisa’g sa iyang anak, manan-aw sila, sila rang duha og sine. Magselos siya nganong sila rang duha,” saysay ni inahan.
Dugang sa inahan sa biktima nga bisan og mapasaylo niya ang suspek apan kinahanglang kining mabilanggo ug atubangon ang iyang kaso.
“Hinaut lang gyud nga ma-priso gyud si Charlene. Pasayloon pud sir pero kinahanglang ma-priso gyud siya,” tataw sa inahan.
Nanawagan usab ang inahan sa biktima sa ilang kaparyentehan nga gihaya si Teresa Mae sa ilang balay sa Salvacion Mawab, ComVal samtang gikatakdang ilubong kini sa July 11, 2019 sa La Filipina, Tagum City, Davao del Norte.
RadyoMaN Kirby Manzon, RadyoMaN Don Pulayao
