Davao City-Dili makumpleto ang pagsaulog sa Kadayawan Festival og wala ang iladong street dancing competition sa syudad sa Dabaw.
Gisadya sa 18 ka mga contingents sa Indak-Indak sa Kadayawan ang mga misaksi pinaagi sa pagpakita sa nagkadaiyang festival sa Mindanao gani dili lang ang mga mitan-aw ang nasadya lakip na ang mismong mga nagperform sa maong street dance competition.
Human sa performance stopover ug grand showdown sa mga entrante, gideklara gilayon ang mga midaug sa nasangpit nga aktibidad.
Dako ang kalipay sa mga taga- Asuncion-Sagayen National School Performing Arts human nila nasungkit ang Grand Champion ug Best In Music award alang sa open category.
Samtang anaa sa 2nd place ang Polomok South Cotabato- Landan National High School Performing Arts Group, 3rd placer ang Municipality of Compostela- Gabi National High School, 4th placer ang Mati Davao Oriental-Matiao National High School, Sambuokan Festival ug anaa sa 5th place ang Brgy. Panay of Sto. Niño, South Cotabato – Hamungaway Performing Arts.
Alang sa Davao School Based Category nag over-all champion ang Davao City National High School Special Program In The Arts- Sining Sayon Dawet Cultural Emsemble samtang anaa sa 2nd place ang Sta. Ana National High School Performing Arts Guild, 3rd placer ang Buhisan Elementary School, 4th placer ang Francisco Bustamante Central Elementary School ug anaa sa 5th place ang Jose Bastida Elementary School.
Nakadawat og 700,000 pesos cash prize ug trophy ang grand champion alang sa open category samtang 500,000 cash ang madawat sa nakadaog sa Davao City School Based Category.
Subay sa maong aktibidad, dako ang pasalamat ni Davao City Mayor Inday Sara Duterte-Carpio sa tanang katawhan nga miduyog ug naki-sadya sa selebrasyon sa Kadayawan.
“Magpasalamat ko sa suporta sa katawhan sa selebrasyon sa Kadayawan particularly ang Indak-Indak karon, we are happy na walay major incident nga nahitabo, and we are happy sa participation sa mga taga Davao and outside Davao,” sigun ni Mayor Inday.
Human sa Indak-Indak, atangan sab karong adlawa, Agosto 19 ang Sayaw ug Tunog Kadayawan samtang ugmang adlawa, Agosto 20 mao ang Pamulak sa Kadayawan ug Pitik Kadayawan.
Kasamang Renelyn Barbarona
