Iloilo City – ” Bisan ano mo pa
ka buot kon ga-init ang ulo mo, indi gid mahimo nag indi ka ma-impito.”
Ini ang pahayag ni alyas Neneng, 26 anyos matapos iya ginbuno sang gunting
ang bana nga si alyas Toto, 41 anyos sang La Paz, Iloilo City.
Pagsaysay ni Neneng, nagapangimon si Toto bangud masami siya nagatext kag
may kaistorya sa cellphone apang paathag ni Neneng, iya lang gina-istorya
ang iya mga tiya kag paka-isa.
Dugang pa niya nga nangakig si Toto kagab-i , Marso 19 sang naabtan siya
nga nagatext kabangdanan nga nagluntad ang pagbina-isay.
Ginpahayag ni Neneng nga ginsakit siya sang bana, ginsumbag, ginsipa kag
gintapak-tapak.
Ginpahayag ni Neneng nga nakaangkon siya sang madamo nga bukol kag
nagkalagisi gid ang iya bayo bangud sang natabo.
Sang nagtuyo ini nga maglayas , ginpanggisi sang iya bana ang iya mga bayo
rason nga nangdulom ang iya panan-awan bangud sang kaakig nga nabatyagan
kag ginbuno sang gunting ang bana nga na-igo sa dughan.
Apisar sini, ginpahayag ni Neneng nga ginkastigo siya sa gihapon sang bana
tubtob ginhublasan samtang nagahinibi ang ila anum ka anak nga nagahingyo
nga untatan na ni Toto ang pagsakit sa iya.
Gindala sa West Visayas State University Medical Center si Toto samtang
preso naman karon sa Lapaz Police Station si Neneng.
Gintuad ni Neneng nga makapila na ka beses nga ginsakit siya sang imunan
kag palahubog nga bana apang iya na lang ini ginahipsan kag nagpa-iway
para lang sa ila kabataan magluwas lamang kagab-i nga na-impito na siya sa
ginahimo sang bana.
Gin-ako ni Neneng sa RMN news team nga naluoy siya sa iya mga kabataan
ilabi pa nga nagaplano si Toto nga magpasaka sang kaso batok sa iya.
