Kumbinsido si Albay 2nd District Rep. Joey Salceda na mahirap talagang makahanap ng trabaho ang mga bagong nagsipagtapos ngayon na nabibilang sa pandemic generation.
Pero diin ni Salceda, hindi ito dapat isisi lang sa kakulangan ng soft skills ng mga newly grad lalo’t malinaw sa obserbasyon ng international studies na nagkaroon talaga ng epekto ang lockdown at isolation sa pag-aaral ng mga estudyante kung saan wala silang kahalubilo.
Diin ni Salceda, may malaking ambag din ang inflation kaya nahihirapan sa paghahanap ng trabaho ang nakararami sa pangkalahatan.
Kaya giit ni Salceda, dapat mapababa ang presyo ng pagkain, petrolyo at kuryente upang makalikha ng dagdag pang trabaho para sa bagong miyembro ng workforce.
Dagdag pa ni Salceda, kung pagbabatayan ang job figures ay masasabing may problema rin sa hard skills ang sektor ng paggawa.
Tinukoy ni Salceda na base sa datos, mula February 2022 hanggang February 2023, ay nakapagtala ng pagtaas sa empleyo ang lahat ng propesyon maliban na lamang ang managers; skilled agriculture, forestry at fisheries; at crafts, trades and related works.
Bunsod nito ay iminungkani ni Salceda na makabubuting pag-aralan kung anong mga skill ang kailangan sa ating ekonomiya na dapat taglayin ng mga naghahanap ng trabaho sa bansa.
