Davao City – Dili magduha-duha ang gitahasang ahensiya sa lokal nga kagamhanan sa pagrelokar sa mga residente nga nanimuyo sa low lying areas nga sagad maigo sa baha panahon magbunok ang ulan sa siyudad.
Butangan og ngipon sa Davao City Housing ang kamandUan ni Mayor Inday Sara Duterte-Carpio nga pahawaon na ang mga nanimuyo sa low lying areas ug irelokar sa mas luwas nga lokasyon sa dakbayan.
Matud ni City Housing Chief Roy Rigor nga sundon nila ang direktiba sa Mayora tungod alang man kini sa kaluwasan sa mga residente nga nagpuyo sa bung-aw sa kalamidad gumikan ka-ubos sa lugar.
Suma ni Rigor, dunay relokasyon gi-andam ang lokal nga kagamhanan alang sa maapektohan apan mag-binuwan og bayad ang mga kwalipikado apan sa ubos nga kantidad lamang.
Dili maseguro sa opisyal kun abagahon ba sa kagamhanan ang kantidad sa balay apan labing sigurado adunay madawat nga ayudang pinansiyal ang tanang ibalhin sa relokasyon.
Dugang eksplinasyon ni Rigor nga sukad pa kaniadto walay ni usa gitugutan magtukod og gambalay sa mga low lying areas.
Apan lisod mapugngan ang mga tawo sa pag-istalar sa mga low lying areas bisan og nasayod sila sa ihatud nga peligro ngadto nila, dugang pamahayag sa opisyal.
RadyoMaN Joel Viray
