Patay ang usa ka inilang negosyante sa lungsod sa San Francisco, Agusan del Sur human gipusil sa duha ka wala mailang armadong lalaki nga sakay sa kolor itom nga motorsiklo nga walay plate number kagahapon sa Brgy. 3, San Francisco, Agusan del Sur.
Giila ang biktima nga si Ronald Sanchez Villacin, 37 anyos, minyo og miyembro sa grupong Fraternal Order of Eagles, residente Brgy. 3 sa maong lungsod.
Pamahayag ni PSupt. Bonifacio Estrella Jr., Hepe sa San Francisco Municipal Police Station, pauli na ang biktima sakay sa motorsiklo dihang gipusil kini sa riding in tandem gamit ang caliber 45 pistol nga miresulta sa kamatayon.
Niya pa, padayon pa ang ilang imbestigasyon apan duha ka anggulo ang gitutukan karon nga posibleng motibo sa pagpatay sa biktima, una robbery gumikan kay aduna matud pay bitbit nga salapi ang biktima sa dihang gipusil kini ug ang ikaduha sa negosyo.
