Davao City – Hangtud karon nagpadayon pa gihapon ang dili pareho nga tratamiento sa hustisya tali sa mga dato ug sa mga pobre dinhi sa Pilipinas, sumala sa usaka lider sa pundok-relihiyoso denheng dapita.
Usa sa ehemplo mao ang Maguindanao massacre diin walo na ka tuig ang kaso apan hangtud karon wala pa gihapon mahatag ang hustisya ngadto sa mga biktima.
Sumala ni Monsignor Vic Polistico sa hut-ong Filipinista nga nawad-an na siya og paglaum nga aduna pay hustisya maangkon ang mga kabanay sa mga biktima sa Maguindanao Massacre.
Oportunidad na unta sa gobyerno karon nga mapakita sa katawhan nga ang hustisya sa nasud walay gipili madato man o pobre kun nahatag dayon ang hustisya sa mga kabanay sa masaker.
Suma ni Polistico nga dili ordinaryo ang Maguindanao massacre busa puntos unta sa kagamhanan kun nakumbikto dayon ang pamilyang Ampatuan ug naangkon ang hustisya sa mga biktima.
Ang gidugayon sa dagan sa kaso sa Maguindanao massacre dili lang nga wala maayo ang samad inay mas nagpasamot pa kini sa kasakit nga gibati sa mga kabanay sa mga biktima.
Bugtong ang pagkumbikto sa mga akusado nga gipangunahan nila Zaldy Ampatuan ug Andal Ampatuan, Jr. maoy makahatag hustisya sa mga biktima, segun sa religious leader.
Subo man pamanladungon, apan dili matago ang reyalidad nga kun kwartahan ug gamhanan gani ang nalambigit sama sa mga politiko gamay pa sa buslot sa dagom ang tsansa nga sila mapreso bisan og bug-at ang mga ebidensiya nga magduot kanila sa kaso.
Gidugang ni Polistico nga sa atong panahon karon nakagamot na og maayo ang political dynasty ug ang mga warlord sa Pilipinas busa lisod na kini lamyon sa kalayo aron ugdawon.
Bisan og ang tibuok termino ni Pangulong Rodrigo Duterte dili paigo sa paglutos sa mga warlords ug pagbungkag sa political dynasty sa nasud sanglit nakakupot og maayo sa yuta ang ugat niini.
RadyoMaN Joel Viray
