Away trapiko ang dahilan ng insidente ng road rage na nauwi sa madugong pamamaril sa kahabaan ng Marcos Highway sa Antipolo, Rizal kahapon.
Ayon sa Antipolo PNP, habang binabagtas ng suspek na driver ng SUV ang kalsada pababa ng Cogeo ay muntik na umano nito masagi ang grupo ng motor rider.
Depensa ng 28-anyos na suspek, walang gitgitang naganap sa pagitan niya at ng biktimang rider.
Nagawa niya lamang ang pamamaril upang protektahan ang sarili matapos na kuyugin at pagbubugbugin ng mga nakaalitan nito.
Humihingi naman ng pasensya ang suspek sa pamilya ng mga biktima matapos ang insidente.
Sa ngayon nananatili sa ospital ang 29-anyos na umawat sa insidente habang ang 52-anyos na lalaki ay nasa kritikal na kondisyon matapos na tamaan ng bala sa ulo at sumailalim na sa operasyon.
Samantala, nakalabas na ng ospital ang dalawa pang sugatan sa nangyaring insidente kabilang ang kinakasama ng suspek.
