Roxas City, Capiz – Ginpasakaan na sang kaso sa Hall of Justice sa Roxas ang apat ka mga persona nga suspek sa pagluthang-patay sa biktima nga si Ret. Msgt Joniffer Borda nga supervisor sang Golden Claw Security Agency sang nakaligad nga Hulyo 20, 2020 sa Brgy Bolo, Roxas City. Kaso nga robbery with homicide ang paga-atubangon nga kaso sang mga suspek nga sanday Rogelio Padernal y Teofilo, 39-anyos sang Barangay San Jose, Roxas City; Garry Onilan y Barrios, 39-anyos sang Sitio Bato-Bato Barangay Dulangan, Pilar, Capiz kag Ian Calleja y Abagatnan, 28- anyos sang Purok 1 Barangay Tacbuyan, Estancia, Iloilo. Samtang ginpasakaan man sang kasubong nga kaso ang at-large nga si Romulo Briol alyas “Mulong” nga isa man sa imbolbado sa amo nga krimen.
Kahapon nga adlaw, ginpresentar sa mga katapo sang media ang mga narekober nga ebidensya kalakip ang motorsiklo, tatlo ka mga armasluthang, mga bala, jacket, bag, helmet kag nabilin nga cash nga dala sang biktima sang ini ang gin-hold up.
Suno kay Capiz PPO Provincial Director Col Julio Gustilo Jr., ginakabig na nga “case close” ang amu nga kaso.
Iya man nga ginpanginbulahan ang kapulisan sang Roxas City PNP sa madasig nga pagkadakop sa mga suspek sa pagluthang patay sa retired army kag supervisor sang Golden Claw Security Agency.
Nagpaandam man ini sa wala pa nadakpan ng suspek nga may malawig pa ini nga tyempo agud nga magsungka sa mga kapulisan.
Samtang iya man nga ginpasalamatan ang mga katapo sang media kag mga asset nga naghatag sang mga vital informations agud nga masolbar ang kaso. Subong man ang kooperasyon sang Pilar Municipal Police Station, Capiz Provincial Mobile Force Company kag Estancia Municipal Police Station.
