Nagtaas ang narecord nga insidente sang sunog sang 2018 kon ikumparar sang 2017 sa bilog nga rehiyon 6 base sa data sang Bureau of Fire Protection ukon BFP.
Ginpahayag ni Fire Chief Inspector Melanie G. Habawel sang Operations Division sang BFP nga sang 2017 may ara sang 1,546 ka nalista nga sunog sa rehiyon samtang nagtaas naman sa 1, 619 ang narecord sang 2018.
Samtang, nagnubo naman ang nalista nga fire incidents sang Enero subong nga tuig kon ikumparar sa kaangay nga period sang nagligad nga tuig.
Suno kay FCI Habawel, sang Enero 2018 may 184 ka sunog nga nabalhag sa rehiyon samtang 103 naman ang nabalhag sang Enero subong nga tuig.
Nagpanugyan naman si Iloilo City Fire Marshall Fire Chief Inspector Cristopher G. Regencia sa publiko nga maghalong kag mangin mabinantayon agud malikawan ang sunog.
Ang bulan sang Marso ginakabig nga Fire Prevention month kag subong nga tuig ini ang may tema nga, “Ligtas na Pilipinas Ating Kamtin, Bawat Pamilya ay Sanayin, Kalaaman sa Sunog ay Palawakin.”
