Insidenteng kawat giaksyonan sa kapulisan

Davao City – Gi-aksyonan dayon sa mga personahe sa Sta. Ana Police Station, ang nahitabong kawat sa ilang area of responsibility (AOR), human narescue ang menor de edad sa Magsaysay Park, Davao City human nalambigit sa kawat niadtong Agusto 9, 2023, sulod sa usa ka establisemento nga nakita sa CCTV Camera ug gikustodiya na karon sa Bahay Pag-asa.

Sa interview sa DXDC RMN Davao kang Police Captain Rizalito Clapiz III, Deputy Chief sa Sta. Ana Police Station gibutyag niini, mihimo na usab og follow up investigation kabahin sa lain na usab nga biktima sa kawat nga usa ka estudyanting babayi sa Barangay 23-C, Davao City.

Segun ni Clapiz, sa mga nabiktima sa kawat mas maayong i-report dayon sa Presinto Uno (Sta. Ana Police Station), aron matagaan og action sa awtoridad og dili dayon magpost sa social media.

“Ato lang pahimangno sa katawhan nga kun mahimo atong mga gamit aron dili makawat dili nato tagaan og opportunity bantayan pod nato”,sulti ni Clapiz.

Dugang sa opisyal, gipakusgan ang police visibility, pagpatrolya sa ilang area of responsibility (AOR) tungod sa selebrasyon sa 38th Kadayawan sa Davao, diin hugot gibantayan sa kapulisan ang mga aktibidades.

Sa gihimong pagsusi sa DXDC RMN Davao news team sa Sta. Ana Police Station, wala pay complainant nga mipatim-aw kabahin sa nahitabong kawat sa Brgy. 23-C nga gitohoang membro sa akyat bahay ang mga suspect.

RadyoMaN Don Pulayao