Davao City – Gitambagan ni Lizada District III Barangay Captain Remegio Licera ang mga botante nga kung mahimo, i-agi una sa makuti nga pagsusi ang matag kandidato una pa man muabot ang Mayo 13, 2019, ang adlaw sa paghukom alang sa tanang nagpapili.
Matud ni Licera, dili lalim kung ang makakupot sa gahum kadtong abusador ug walay gugma sa pagpangalagad sa lokalidad ug sa katawhan gawas lamang sa tinguha nga mupahimulos sa gahum ug interes lamang sa pipila ang silbihan inay ang kinabag-ang duot sa katawhan nga maoy nagtuboy kanila sa katungdanan.
Dugang ni Licera, samtang aduna pa’y pila ka semana ug adlaw nabilin una ang adlaw sa paghukom, karon pa lamang daan suwetohon na ang mga nagpapili aron sa ingon ang matarong ug dili dautan ang mabotaran sa eleksyon.
Pipila sa mga tips nga gilatag ni Licera isip giya sa mga botante sa pagpili sama sa pagkahibalo nato sa pagkatawo ug background sa pamilya, batasan, edukasyon,propesyon, rason sa pagdagan ingon man plataporma.
Dugang ni Licera nga angay himoon nga sukdanan sa pagpili ang kinaiya kun hiyas sa pagka-diyosnon, makakalikasan, makatao, makabayan ug dugang pa ang baruganan sa matag isyu sa atong nasud.
Pikas bahin, nagpasidaan si Licera sa mga botante nga balibaran nato ang mga pulitiko nga walay maayong record sa pagpanerbisyo ilabi na kun nabulit sila sa anomaliya ug kurapsiyon.
RadyoMaN Joel Viray
