Intensified security measures gimontar

14

Davao City – Mas gipalig-on pa karon sa Police Regional Office (PRO-XI) ang kinatibuk-ang security measures sa Region XI gumikan sa pagbusikad sa ikaduhang bomba sa Isulan, Sultan Kudarat diin usa ang patay ug kapin pulo ang angol.

Sa interbyu kang PRO XI Regional Director Police Chief Supt. Marcelo Morales, nagdugang og random mobile checkpoints ang tactical units sa mga lugar sa Rehiyon Onse ilabi na sa mga kasikbit nga lugar aron dili makasulod sa syudad sa Davao ang mga terorista ug uban pang dautang elemento.

Gimandoan usab niini ang tanang unit commanders nga kanunay maglusad og inspeksyon sa mga vital installations lakip na ang internet cafes aron maseguro ang kaalerto sa kapulisan ug mabatukan ang posibleng terror attacks.

Dugang niini, hugot nga gipatuman sa Davao City Police Office ang foot patrol alang sa pagmonitor sa krimen.

Subling gidasig ni Morales ang katawhan nga magmaigmaton ug makigkoordinar sa kapulisan panahon nga adunay mamatikdan nga kadudahang lihuk sa mga tawo.

Naghatag usab kini og kaseguruhan nga andam ang kapulisan sa mga wala damha nga sitwasyon.

RadyoMaN Jason Amisola

Facebook Comments