Davao City – Pormal nang gimugna karong adlawa, Mayo 31, ang Inter-Agency Task Force batok sa mga malimbungon kun Fraudulent Financial Investment Schemes nga naga operate dinhi sa Davao region.
Kini atol sa nagpadayong 257th Regional Law Enforcement Coordinating Council (RLECC) Meeting sa pagpanguna ni PRO-XI Regional Director PBGen. Marcelo Morales nahinayon sa DENR-XI conference room nahimutang sa Lanang ning syudad sa Davao.
Sumala ni Morales nga ang maong Task Force gilangkuban sa 11 ka managlahing ahensiya sa gobyerno partikular ang Crime Investigation and Detection Group (CIDG), Bureau of Internal Revenue (BIR), Bangko Sentral ng Pilipinas (BSP), Department of Trade and Industry (DTI), Philippine National Police (PNP), Department of Justice (DOJ), Social Security System (SSS), Philippine Information Agency (PIA), National Bureau of Investigation (NBI) ug National Intelligence Coordinating Agency (NICA) diin ang Regional Director sa Securities and Exchange Commission (SEC) ang mamahimong Chairperson.
Sa pagkakaron aduna nay 53 ka mga financial companies ang nalambigit sa investment scheme diin butyag niini nga 14 na ang napa-undang sa pag operate.
Samtang gikanayon ni SEC-XI officer-in-charge Atty. Katrina Jamilla Estares nga nagpadayon ang ilang monitoring ug imbestigasyon sa mga naglihok nga investment schemes sa rehiyon.
Misaad usab kini nga paspasan nila ang pagsuta sa maong mga establisemento.
Human sa pagkamugna sa Task Force, magpulong na ang mga membro niini alang sa ilang mosunod nga mga lakang ug lauman ang dugang pang pagpasara sa mga iligal nga investment schemes padayong ga-operate dinhi sa Davao region.
RadyoMaN Jason Amisola
