Pinawi ng Metropolitan Waterworks and Sewerage System (MWSS) ang pangamba ng publiko sa posibleng kontaminasyon ng Coronavirus Disease o COVID-19 sa inuming tubig at wastewater sa Concession Areas.
Ayon kay Patrick Lester Ty ang Chief Regulator ng MWSS Regulatory Office, tinitiyak nito na ang Water Supply mula sa kanilang Distribution Systems hanggang sa mga customers ay disinfected ng chlorine.
Nakakasunod aniya ito sa pamantayan ng Philippine National Standard for Drinking Water na itinakda ng Department of Health.
Paliwanag pa ni Ty, wala raw dapat ikabahala ang publiko dahil malinis sa anumang bacteria o virus kabilang ang COVID-19 virus ang tubig at ligtas para sa Domestic Consumption.
Pati na rin aniya ang Wastewater mula sa Sewage o Septage Treatment Plants ay disinfected din ng chlorine.
Tinitiyak ng MWSS Regulatory Office sa Publiko na ang patuloy at mahigpit na Monitoring sa kalidad ng inuming tubig at Wastewater ay para protektahan ang kalusugan at kaligtasan ng mga consumers, gayundin ang kapaligiran.
