Davao City – Usa si alyas Samuel kinsa usa ka negosyante og molasses nga nag-operate sa Rehiyon Onse ug sa North Cotabato ang nawad-an na og paglaum nga dayonon sa Rigen Marketing ug sa KAPA ang ilang saad nga refund.
Sumala ni alyas Samuel nga nahurot na ang iyang pabilo sa pagpaabot nga tumanon sa Rigen Marketing ug sa KAPA ang saad nga refund ug makuha og balik ang iyang tunga sa milyon ka pesos nga investment nga taud-taod na niyang gihuwat aron pangdugang unta sa kapital sa ilang negosyo nga molasses.
Giangkon ni alyas Samuel nga ang iyang misis maoy unang na-ingganyo ug nakadesisyon nga widrohon tanan ang ilang tinigom sa bangko aron ibutang sa mga investment companies kay lagi nangyawat nga paspas mudako ilang hinagoang kwarta.
Matud sa dismayadong negosyante nga dili na kini motoo pa sa bisan unsang advisory nga ipagawas sa Rigen Marketing hilabi na kung ang saad mahitungod sa refund sanglit dili lang kay ka-usa gipakyas ang pasalig apan makadaghan nang higayon.
Gitawag nga bakakon sa laing investor nga si Alyas Dodoy ang Rigen Marketing kay nagsige na lamang kini og saad nga ibalik ang kwarta apan hapit na lang ang pagsaulog sa pasko wala gihapoy natigayon nga refund sa kwarta sa mga tawo.
Punto pa ni alyas Dodoy nga kung may tingoha pa ang Rigen Marketing ug uban pang iskema nga mag-refund unta ila nang gibuhat sa unang adlaw pa lang sa kamandoan ni Pres. Rodrigo Duterte nga sirad-an ang mga investment schemes apan nila kini buhata.
Nagtoo si alyas Dodoy nga gibungat lamang ang maong saad aron dili masuko ug musang-at og kaso ang mga investors batok sa Rigen Marketing ug uban pang investment companies sanglit ang tinuod gayod nilang tumong dili mag-refund ug sibatan ang mga investors.
Busa gidasig ni alyas Dodoy ang ubang mga investors nga isipon na lang nga usa ka pangit nga damgo ang ilang gidangatang pag-intra sa Ponzi scheme nga sistema aron sa ingon dili na magsakit ang ilang mga dughan tungod sa mga ningbutho nga investment schemes nga misuyop sa ilang gipaningkamotang kwarta.
RadyoMaN Joel Viray
