Davao City – Gi-alkontrahan karon sa Department of Interior and Local Government (DILG-XI) ang pagtoo sa kadaghanan nga wala na’y mahimo ang ilang buhatan sa pag-implementar sa ‘Cease and Desist Order’ nga gipagula sa Securities and Exchange Commission (SEC) batok sa iskema nga nagtanyag og 30% nga interest gikan sa mga tawo nga nangiyawat og dako’g balik sa ilang capital.
Gibutyag ni DILG-XI Regional Director Alex Roldan nga walay buhatan ug bisan na gani ang korte puwedeng musanta nila gikan sa pagpatuman sa ‘Cease and Desist Order’ sa SEC kontra sa usa ka iskema nga gipadagan sa usa ka pastor ug uban pang investment schemes nga mibutho sa dinhi sa Rehiyon Onse.
Ang mga iskema karon makunsidera kini nga pagsabotahe sa ekonomiya sa usa ka lugar ug sa tibuok Pilipinas.
Segun ni Roldan, ang pagpanghilabot sa gobyerno alang lamang kini sa kaayohan sa tanan gikan sa epekto sa ekonomiya ug sa puwersa sa mamumuo nga siguradong magpahag-sa og maayo sa produksiyon sama sa agrikultura nga aspeto kay wala naman unya’y mag-uma.
Mstud ni Roldan, ang rason sa kadaghanan nga sila nahaw-as gikan sa kalisod gumikan sa mga iskema karon realidad na apan kun ang bugti man pod niini mao ang paghuyang sa haligi sa patigayon nan mas maayng unhan na lang og santa kini sa gobyerno aron masalba pa ang ekonomiya sa nasud.
Pasidaan pa sa opisyal ngadto sa mga nagbundak og capital nga dili dangtan og dugay, hinayhinay rang mahubas ang pondo hangtud wala na’y makuhaan og pangpabayad sa dagkung interest ang mga investment institutions sama sa nahitabo sa Jacama, Aman Ventures, Legacy ug First Quadrant nga pulos nanirado.
Giklaro pa sa DILG-XI director nga wala’y labot ang kagamhanan sa kwarta sa mga tawo ug dili usab sila puwedeng manghilabot or bin ba kaha but-an ang usaka tawo kung unsaon ug asa nila idapat ang ilang mga salapi apan ang problema kay ang gobyerno ra gihapon ang mag-abaga panahon nga kalit manirado ang mga investment institutions ug mahagsa unya ang mga sistemang susama sa pyramiding kun Ponzi schemes.
RadyoMaN Joel Viray
