Davao City – Nagpahimangno karon ang Association of Securities Analysts of the Philippines Incorporated (ASAPI) sa publiko batok sa mga investment companies nga nagatanyag og dagku nga interest alang sa daku nga nga investment capital.
Matud ni Executive Director Prof. Astro Del Castillo, ang mga kumpanyang nagpadagan sa naasoy nga iskema makunsidera kini nga scam busa angay kining likayan sa katawhan aron dili mailad.
Segun ni Del Castillo, ang maong iskema dili maka-sustiner sa ilang operasyon diin moabot ang panahon manirado ra pod kini diin ang makaluluoy kadtong ulahi nang nag-invest og kapital.
Sumala pa sa economic analyst, kadudahan ang mga investment companies nga nangbutho karon dinhi sa rehiyon ilabi na kung asa nila gikuha ang dakung salapi aron ibayad sa naglobo usab nga interest sa ilang mga investors.
Bisan pa kun gi-reinvest nila ang kwarta sa foreign exchange kun forex o bin ba kaha sa gitawag nga crypto currency nga Bitcoin nga uso kaayo karong panahona, dili gihapon kini garantiya aron ilang mabayran ang tanan nilang investors sa daku kaayo nga interest nga ilang ginabandilyo silbing come-on kun pagpangdani sa mga interesado.
Alang sa maong financial expert, ang 400-600% nga tubo dili na realistic alang sa mga kumpanya nga gadawat og investment kay bisan ang bangko wala gahatag og ing-ani ka dako nga interest subay sa gisunod nga business model.
Hinoon, aminado si Del Castillo nga duna gayuy nabulahan sa iskema apan kini pipila lamang ug mas daghan pa gihapon sa mga investors ang mamahimong ala-ot unya ilabi na kun ulahi nang nagbutang og kapital ug maoy madut-an panahon nga mahagba na unya ang pyramid scheme.
Gitambagan sa professor ang publiko nga susihon gayud ang tanang legalidad sa kumpanya kung kini rehistrado ba sa Securities and Exchange Commission (SEC), sa Bangko Sentral ng Pilipinas (BSP) ingon man kun nagtenir ba sila sa mga pertinent permits gikan sa lokal nga kagamhanan isip pagpamatuod nga lehitimo ang ilang operasyon.
Samtang gihagit usab sa maong resource person ang nagkadaiyang law enforcement agencies sama sa Philippine National Police (PNP) ug uban pang units nga ayudahan ang SEC diha sa pagpanirado sa mga investment companies aron mahunong na ang ilang pagpang-biktima sa katawhan.
Apas-sumpay pa nga tambag sa financial analyst ngadto sa mga tawo nga mag-invest lamang diha sa lehitimong portfolio sama sa ginatanyag sa bangko o dili ba kaha sa stock market aron may igong proteksiyon ug dili mahanaw daw aso or ma-water ba kaha ang investment.
RadyoMaN Joel Viray
