IPADAYON ANG LEGASIYA | Asawa sang ginpatay nga punong barangay sa Capiz, napilian bilang barangay chairman!

97

Roxas City, Capiz- Sa ginpatigayon nga Sanggunian Kabataan kag Barangay election sang nakaligad nga Mayo 14, 2018 napilian bilang punong barangay sang Lawaan ang asawa sang ginpatay nga si Punong Barangay Elvis Asis.
Si Mrs. Jocelyn Asis nga ginpahanugotan sang Comelec nga magtal-os sa kandidatura sang nagtaliwan nga bana ang nakakuha sang kabug-osan nga 2, 692 ka boto.
Sa eksklusibo nga interview sang news team kay Asis, emosyonal ini nga nagpasalamat bangod sa pagsalig nga ginhatag sa iya sang mga kasimaryo. Kadungan sini, ginpasalig man niya nga ipadayon ang mga nahimoan kag legasiya sang nagtaliwan nga bana nga si Elvis Asis.
Nahibaloan nga base sa inisyal nga impormasyon, sa maabot nga Mayo 20, 2018 pagadal-on sa iya katapusan nga palahuwayan si Asis.
Sa madumdoman, sang nakaligad nga Abril 27 sang gab-e, ginsunod sang duha ka mga suspek si Asis samtang nagasakay sa motor kag ini ang ginluthang. Gindala pa ini sa pinakamalapit nga ospital apang gindeklarar sang doktor nga ginbawian sang kabuhi samtang ginabulong. Nag-angkon ini sang patal nga pilas malapit sa iya tagipusuon, tangkugo kag butkon.

Facebook Comments