Davao City – Samaran ang usa ka 60 anyos tungod matud pa naigo sa parte sa usa ka puthaw human miigo ang dakong ipo-ipo sa Brgy. Lapu-Lapu, Davao City bandang alas 7 kagabii, Hulyo 22, 2018.
Sa pakighinabi sa DXDC RMN Davao kang Maria Cielo Canales, SK Kagawad sa Brgy. Lapu Lapu, Agdao kinsa gitahasan usab ni Brgy. Captain Romeo Evangelista sa nasangpit ng Brgy. nga monitoron ang maong panghitabo, sigun niini nga adunay samdan sa nahitabong ipo-ipo gawas sa kapin usa ka gatus ka mga indibidwal nga naapektuhan niini diin ang uban usab natanggalan og sin sa ilang mga balay.
Samtang sa report sa Police Regional Office kun PRO XI, giila ang biktima nga si Billy Erno ug residente sa nasangpit nga lugar kinsa daling gidala sa balay-tambalanan aron sa pagpatambal.
Giingong sa purok 8 IKP ang sentro sa giingong ipo-ipo apan gipahimangnuan kagabii ang mga kasikbit nga lugar niini sama sa purok 9 South Bay, purok 5 Davao Farm, purok 10 Sea Side nga mubakwit usa aron masigurong luwas diin 38 ka mga pamilya ang temporaryong gihikling sa brgy Lapu-Lapu gym bandang alas 8:30 sa gabii apan pag abot sa alas 10 sa gabii, giabisuhan na sila nga pwede ng mamalik sa ilang tagsa-tagsa ka mga panimalay apan pipila ka mga residente ang gipili una ang magpagabii sa gym tungod sa kahadlok nga mausab ang ipo-ipo.
Dugang niini, dali usab mirescue ang kasundaluhan, kapulisan ug uban pang mga otoridad sa area lakip ang mobile kitchen sa City Social Services and Development Office kun CSSDO nga nag apod-apod og pagkaon sa mga mihikling nga mga pamilya sa gym.
Gawas usab sa nasamdan, adunay mga wires sa internet ug kuryente sa may IKP, Lapu-Lapu ang nangaigo sa pagtumba sa kahoy tungod sa ipo-ipo diin naabtan sa news team kagabii ang mga line man sa Davao Light and Power Company kun DLPC nga nagapahigayon og clearing operation sa apektadong dalan.
Subay niini, nagpahimangno ang Office of Civil Defense kun OCD XI nga kanunay magmaigmaton ug alerto lang ilabi na sa mga warning gani nagpahinumdom usab sila sa publiko nga dili magpataka og post ug pagpakalat og fake news kalabotan sa tsunami alert tungod matud sa OCD XI nga posibleng aduna lang tsunami og mutay-og ang linog gikan sa dagat apan walay warning na tsunami alert sa nahitabong ipo-ipo kagabii diin kinahanglan likayan ang pagpakatag sa dili beripikadong impormasyon aron dili magpanic o mataranta ang katawhan ilabi na kadtong nakapuyo duol sa kadagatan.
RadyoMaN Renz Barbarona
